Nº de visitas: 978840

Obradoiro de escrita creativa coa poeta Támil Salma
27/05/2011    Máis novas

SALMA. Rokkiah, máis coñecida como Salma (Thuravarankurichi, 1970) é unha das escritoras támiles máis relevantes do panorama literario indio. Salma provén dunha familia tradicional musulmá dunha aldea próxima á cidade de Tiruchirapalli, e como moitas rapazas da súa rexión non rematou a escola primaria. Aínda así, dende os trece anos comezou a escribir poesía e máis adiante comezou a publicar en revistas literarias. Durante anos escribiu na clandestinidade pola oposición da súa familia. Salma ten publicadas varias antoloxías poéticas, entre elas Oru malaiyum, innoru malaiyum (Unha tarde, outra tarde) e Pachai Dvadhai (A deusa verde), e tamén unha novela titulada Irandaam Jaamangalain Kathai (A historia da medianoite), editada por Xerais con tradución ao galego de María Reimóndez. Salma representa neste momento a única voz de muller musulmá no panorama literario de Tamil Nadu. Por outra banda, a súa obra foi obxecto de críticas destrutivas por parte de varios sectores literarios polo uso da sexualidade feminina dunha maneira aberta na súa obra e tamén polo contido feminista dos seus escritos. Ademais, dende o ano 2001 Salma decidiu levar o seu activismo ao campo da política, onde foi elixida membra do Panchayat (asemblea local) para converterse máis adiante en candidata para o seu distrito electoral polo DMK, partido nacionalista támil laico e progresista.


Inscrición previa no teléfono 986 22 90 74 (luns, de 10 a 14 horas / martes a venres, de 10 a 14 e de 16 a 20 horas). Prazas limitadas

ARQUIVOS ADXUNTOS:
Obradoiro_Implicadas.pdf  213 KB